Partido Nashonal di Pueblo no ta djis kualke partido polítiko.
Origen di nos partido tabata un movementu general di pueblo di Kòrsou, di Banda Riba te Banda Bou pa huntu ku nos emansipashon ekonómiko di e tempu ei, logra nos emansipashon polítiko.
Lantamentu ofisial di nos partido 61 aña pasá, tabata kristalisashon i ekspreshon di e aspirashon outéntiko di nos pueblo, pa asumí un posishon digno den e fila di pueblonan liber di mundu. Pa nos asumí nos resposabilidat propio, pa konstruí futuro di nos mes i nos desendientenan, riba e fundeshi fuerte di nos propio trabou i nos propio desishonnan.
Durante 61 aña nos a yega hopi leu. Di un komunidat kolonial i feodal, dirigí di afó, ku derechinan elektoral, limitá nos a lanta para riba nos pia, pa logra un demokrasia bibu i aktivo. Organisashonnan sosial, polítiko,sindikal i empresial múltiple, ta partisipá aktívamente na e proseso demokrátiko pa forma e mihó opinion.
Pues: progreso i emansipashon a trese diversifikashon. Demokrasia ta enserá lucha di opinion. Anto esaki alabes ta enserá, ku komo komunidat nos mester ta sufisiente fuerte i eduká, pa komprendé proseso aki i no lagué bruha nos pensamentu. Pa nos por distinguí bèrdat for di desviashon, pa nos por destinguí interes general for di interes partikular, ta un solo kriterio mester guia nos opinion i aktuashon. Kiko ta mihó pa Kòrsou? Kiko nos por hasi pa promové bienestar di nos isla i nos pueblo a korto i a largu plaso?
T’esaki ta e kriterio i e prinsipio ku semper a guia Partido Nashonal di Pueblo durante su 61 aña di trabou pa Kòrsou. Tesei ta e kriterio i e prinsipio ku te awe ta dirigí nos aktuashon. T’esaki ta fundeshi di nos lucha i nos eksistensia.
Meskos ku 61 aña pasá, Kòrsou ta pará aktualmente dilanti momentunan difisil pa defendé su emansipashon polítiko. Nos progreso di e último dékadanan a bin kompaña ku kantidat di problema di mundu moderno. Komo partido di Kòrsou, nos ta konsiderá nos responsabilidat pa uni nos forsa pa internamente solushoná e problemanan aki. Nos no por aseptá ku otronan ta usa e problemanan aki pa promové nan interes partikular, asta si esaki ta bai a kosto di emansipashon di Kòrsou.
Manera Doktor a yega di ekspresá:
“Mi no por aseptá, ku nos mes no ta kapas pa uni forsa, sin distinshon di partido, pa protehá nos komunidat i tuma medida bon pensá, pa asina logra hustisia sosial pa mantenshon di nos bienestar relativo.”
Un kos ta sigur. Nos emansipashon di e último, 61 añanan a pone ku Kòrsou por disponé di un kantidat di siudadano responsabel i eduká, kapas di forma i ekspresá nan opinion na un manera digno i korekto. Anto riba e base aki, Partido Nashonal di Pueblo lo sigui na banguardia di emansipashon di pueblo di Kòrsou, ku mantenshon di su patrtiotismo, dedikashon i esfuerso di e último 61 añanan. Partido Nashonal di Pueblo lo sa di superá, pa Kòrsou por progresá.
| Openingstijden | |
| Betaalwijze |