Frente Obrero Liberashon 30 di mei, a wòrdu fundá dia 5 yüli 1969. Su ideologia ta Sosial Demókrata. Su meta un repartishon hustu den nos pais. Su Vishon ta pa un dia Kòrsou ta pará riba su propio pia i ku su yunan di tera mes ta goberná e dushi baranka aki.
Frente Obrero Liberashon 30 di mei, ta wòrdu identifiká ku e kolo oraño. Nifikashon di e kolo oraño ta, ku semper Bo mester ta alerta! E kolo oraño no tin nada di aber ku kas Real di Hulanda! Frente Obrero Liberashon 30 di mei, su fundadornan ta Benjamin“Shon Benchi” Wefer, Willy Haize, Benny Leitoe (q.e.p.d.) i Amador Nita (q.e.p.d.). Naturalmente tin mas persona ku a yuda di un òf otro manera, pero esakinan ta esnan ku ta wòrdu konsiderá komo esnan prinsipal ku a sòru pa e partido wòrdu fundá.
Frente Obrero Liberashon 30 di mei, a partisipá pa promé biaha na un elekshon. Esaki tabata elekshon di Staten, ku a tuma lugá 5 sèptèmber 1969. Tabatin solamente 7 persona riba e lista ku a partisipá na e elekshon ya menshoná! Mayoria di hende tabatin miedu di wòrdu identifiká ku Frente Obrero Liberashon 30 di mei. E gobièrnu di e tempu ei, tabata un ku tabata trapa derechinan konstitushonal i deskriminá kontra e klase trahadó. E 7 pioneronan aki ku a demostrá kurashi, determinashon i kla pa lucha tabata; Wilson “Papa” Godett, Amador Poulo Nita, Stanley Brown, Nelson Genoveva Monte, Luis Medina, Carlos Diaz i J. R.Winklaar. Wilson “ Papa” Godett a guia e partido komo lider polítiko durante e elekshon di Staten. Frente Obrero Liberashon 30 di mei, a haña 12.338 voto, ku tabata bon pa 3 asiento ( Godett, Nita, Brown) den Staten di Antia. Obreronan i esnan pober den nos komunidat a sa na duna nan sosten, apesar di hopi kòntròl sosial i preshon polítiko ku tabata eksistí e tempu ei.
Frente Obrero Liberashon 30 di mei, su rais ta fuertemente ankrá den suela di Kòrsou. Amador Nita a yega di bisa tekstualmente; “ No prekupá ku esnan ku a mata e kurpa, pasobra mi lo ta huntu ku boso pa eternidat ” !
Frente Obrero Liberashon 30 di mei, ta e úniko partido di Kòrsou, ku no a wòrdu fundá den un bar, den restorant òf serka un notario. Frente Obrero Liberashon 30 di mei, a wòrdu fundá a base di un lucha, ku a kousa dramamentu di sanger i tambe kosta bida di Orlando Gerardina i Manuel Antonio Gutiérrez.
Frente Obrero Liberashon 30 di mei, for di su lantamentu na aña 1969 a sa na partisipá na tur elekshon. Frente Obrero Liberashon 30 mei, a sirbi komo skol polítiko pa hopi polítiko. Frente Obrero Liberashon 30 di mei, su sede ta situá aktualmente na Winston Churchillweg # 102. Frente Obrero Liberashon 30 di mei, su number di kuenta na Girobank ta 25.16.62.
Frente Obrero Liberashon 30 di mei, ta konosí pa algun famoso slogan,
“SI MI MURI, SIGUI MI LUCHA”, SOLO EL PUEBLO SALVA EL PUEBLO 1 SIN MIEDU, SIN TEMBLA I BAN SALBA KÒRSOU!
Frente Obrero Liberashon 30 di mei, aktualmente tin komo Lider i Presidente, señor Anthony A. Godett. Señor Anthony A. Godett, a tuma rienda di Frente Obrero Liberashon 30 di mei na aña 1992 for di su tata Wilson “Papa” Godett, ora esaki a bira malu. Señor Anthony A. Godett a sa na guia partido Frente Obrero Liberashon 30 di mei, na éksitonan grandi. For di aña 1991 te ku fecha di awe, e ta miembro di Konseho Insular.
Señor Anthony A. Godett, ta un mucha di pueblo ku a yega hopi leu den polítika, a base di trabou duru, perseveransha, skucha kurason di pueblo kaminda esaki ta bati i dor di lesa hopi. Aktualmente e ta funshoná komo diputado den gobernashon di Kòrsou. Tambe e tabata miembro di Parlamento ( Staten ) pa hopi aña. E’la sa na akapará hopi eksperensia i e ta kompartí esaki ku esnan ku ta interesá. Enemigu ( nan no ta hopi ) i amigunan ta rekonosé i hasta algun tin miedu pániko di dje, pa su manera fuerte i desidido di hiba oposishon, cq. Polítika, pero semper ku e rèspèt nesesario.
Den Gobernashon su palabra ta di Djamanta. Su SI ta SI, i semper e ta kumpli. Su NO ta NO. E’la wòrdu hinka tres (3) biaha den prison sin ku e’la hasi nada. E no ta koperá òf partisipá den aktonanan ilegal. E ta un bon orador, semper bai e ta sa na saká kontrinkantenan polítiko for di nan baliña. Semper e ta papia bèrdat i ta kla para pa yudá, kaminda e por. E ta alkansabel semper pa pueblo den nesesidat i no solamente ora di buska voto durante kampaña elektoral. Frente Obrero Liberashon 30 di mei, ta buskando afiliashon internashonal pa medio di Coppal, tambe Sosialista Internashonal. Frente Obrero Liberashon 30 di mei, tin su ala hubenil i su ala femenino.
| Openingstijden | |
| Betaalwijze |